Ychwanegwch eich llais: Mae ceisiadau i ymuno â Bwrdd Seinio Partneriaeth Genomeg Cymru bellach ar agor ar gyfer 2025!

Mae genomeg, sef astudio ein DNA, yn trawsnewid gofal iechyd yng Nghymru – ac unwaith eto, mae aelodau’r cyhoedd yn cael eu gwahodd i helpu i lunio ei ddyfodol drwy ymuno â Bwrdd Seinio Partneriaeth Genomeg Cymru ar gyfer Cleifion a’r Cyhoedd.

Mae’r Bwrdd Seinio yn dwyn ynghyd amrywiaeth eang o unigolion gan gynnwys y rhai sydd â phrofiad uniongyrchol ac anuniongyrchol o gyflyrau genetig a phrin a chanserau etifeddol, yn ogystal â’r rhai sydd ag angerdd dros wella gwasanaethau genomig yng Nghymru. Gyda phedair ymgynghoriad yn digwydd drwy gydol y flwyddyn, rhoddir cyfle i aelodau gymryd rhan mewn deialog ystyrlon, clywed safbwyntiau ffres, a rhannu eu profiadau a’u mewnwelediadau eu hunain i ddylanwadu’n uniongyrchol ar bolisi, gwasanaethau ac ymchwil.

I rai unigolion, mae’r cymhelliant i gymryd rhan wedi bod yn bersonol iawn

Mae’r aelod presennol Esther yn esbonio ei rhesymau dros ymuno: “Tair blynedd yn ôl, cefais ddiagnosis o ganser y fron lobiwlaidd metastatig, ac yn fuan wedyn, canfuwyd bod gen i fwtaniad genynnol BRCA2. Diolch i brofion genomig, rydw i nawr ar driniaeth wedi’i thargedu na fydd yn fy ngwella, ond a fydd, gobeithio, yn ymestyn fy oes.”

Dywed Esther fod ymuno â’r Bwrdd Seinio wedi bod yn ffordd o roi rhywbeth yn ôl. “Rydw i wedi gallu rhannu fy mhrofiadau fel claf a chyfrannu at drafodaethau a allai wella canlyniadau i eraill.”

I eraill, mae eu cyfranogiad wedi’i wreiddio mewn chwilfrydedd proffesiynol.

Cafodd Yvonne, a ymunodd bron i ddwy flynedd yn ôl, ei chyflwyno i’r cyfle gyntaf trwy ei rôl ym Mwrdd Iechyd Prifysgol Caerdydd a’r Fro. “Roeddwn i’n llawn cyffro i gael fy newis i ymuno, ac yn edrych ymlaen at y ddwy flynedd ganlynol fel aelod,” meddai. Dechreuodd ei diddordeb mewn geneteg mewn lle annhebygol. “Dechreuodd flynyddoedd lawer yn ôl pan ddes i o hyd i lyfr poced ar DNA am 50 ceiniog – agorodd hynny fyd o ddiddordeb yn ein teulu.”

Dywed Yvonne mai ei hoff ran o fod yn aelod yw’r bobl y mae hi wedi’u cyfarfod. “Mae yna gymysgedd mor wych o bobl, ac mae’r straeon a’r sefyllfaoedd a rannwyd wedi bod yn rhyfeddol ac yn emosiynol iawn. Mae’r Bwrdd Seinio wedi rhoi hwb i mi o ran hyder proffesiynol, ac mae wedi cadw fy ymennydd yn weithgar drwy’r holl bynciau a thrafodaethau sy’n ysgogi’r meddwl.”

Ymunodd Emily â’r Bwrdd Seinio ar ôl colli ei merch i gyflwr hynod o brin, yn y gobaith y gallai ei phrofiad helpu eraill. “Nid oedd ei gofal bob amser yn berffaith, ac mae ymuno â’r Bwrdd Seinio wedi fy helpu i droi poen yn bwrpas. Mae wedi bod yn agoriad llygad dysgu sut mae gwasanaethau genomig yn esblygu, ac rydw i wedi gallu cyfrannu mewn ffordd sy’n anrhydeddu ei chof.”

Mae aelodau’r Bwrdd Seintio yn cyfarfod ar-lein ac wyneb yn wyneb i drafod materion allweddol fel profi, ymchwil, mynediad at ddata, a thegwch gofal iechyd. Mae’r sesiynau hyn yn cynnig llwyfan ar gyfer dysgu, effaith a chysylltu.

“Cwrdd ag eiriolwyr cleifion eraill yw un o’r rhannau gorau,” meddai Esther. “Mae pawb yn dod â rhywbeth gwahanol i’r bwrdd. Rydw i wedi dysgu llawer o’r ymgynghoriadau ac o’r straeon mae pobl yn eu rhannu.”

Mae Bwrdd Seinio GPW ar hyn o bryd yn chwilio am aelodau newydd o bob cwr o Gymru, o bob cefndir. P’un a oes gennych brofiad uniongyrchol o gyflwr genetig neu brin neu ganser etifeddol, yn gofalu am rywun sydd â’r cyflwr, neu os ydych chi, yn syml, eisiau cefnogi dull mwy cynhwysol a gwybodus o ddarparu gofal iechyd genomig, croesewir eich cyfraniad yn fawr.

I gael rhagor o wybodaeth am ymuno â’r Bwrdd Seinio ac i gofrestru eich diddordeb, ewch i: Ymunwch â’r Bwrdd Seinio.

Helpwch ni i lunio dyfodol genomeg yng Nghymru – mae eich llais o bwys.