Rydym yn falch iawn o gyhoeddi y byddwn yn lansio Cynllun Cyflawni Cymru ar Genomeg (2026–2029) newydd yn fuan, a fydd yn nodi map ffordd clir ac uchelgeisiol ar gyfer y tair blynedd nesaf.

Gan adeiladu ar sylfeini cryf ein Cynllun Cyflawni 2022–2025, bydd cam nesaf ein rhaglen genedlaethol yn dechrau ar unwaith wrth i’r cynllun presennol ddod i ben — gan nodi symudiad clir o gynllunio cynhwysfawr a gweithredu cychwynnol i gyflawni llawn. Y ffocws yw cydgrynhoi gwasanaethau presennol, gweithredu mentrau newydd ac ehangu i feysydd cyfle ychwanegol er budd cleifion Cymru.

Bydd y Cynllun newydd yn myfyrio ar y cyflawniadau hyd yn hyn, gan amlygu’r effaith, y gwerth a’r cynnydd a wnaed ar draws ein partneriaeth, gan gydnabod sut mae’r dirwedd ehangach wedi esblygu. Bydd hefyd yn archwilio sut y gall Cymru gydweithio’n fwy effeithiol — ar draws gwledydd y DU ac yn rhyngwladol — i ddatblygu partneriaethau strategol, ymchwil a masnachol.

Bydd yn ystyried gwersi a ddysgwyd, gan gynnwys yr heriau yn y byd go iawn o gyflwyno rhaglen uchelgeisiol ar draws strwythurau llywodraethu amrywiol a blaenoriaethau sefydliadol. Bydd y Cynllun wedi’i strwythuro o amgylch sawl maes allweddol gan gynnwys darparu gwasanaethau genomig, ymchwil ac — yn bwysicaf oll — pobl, gan sicrhau dull cyfannol, blaengar sy’n rhoi ein gweithlu a’n cleifion wrth wraidd trawsnewid genomig yng Nghymru.