Ymunwch â’r Bwrdd Seinio

Sut I Gymryd Rhan

Rydyn ni’n ymrwymedig i weithio gyda chleifion ac aelodau o’r cyhoedd i egluro pethau mewn ffordd glir a syml, gan rymuso dinasyddion Cymru i ddeall mwy am yr hyn y gall genomeg ei olygu iddyn nhw.

Ein nod yw recriwtio unigolion newydd sydd ag ystod o brofiadau (naill ai’n bersonol neu’n anuniongyrchol fel gofalwr neu aelod o’r teulu) gan gynnwys:

  • Canserau etifeddol fel canser etifeddol y fron, y prostad, y coluddyn neu ganser yr ofari
  • Clefydau prin fel Ffeibrosis Systig, Clefyd Huntington, Sglerosis Clorog
  • Anhwylderau Oedi Datblygiadol fel Anhwylderau ar y Sbectrwm Awtistig, X Fregus, Syndrom Down
  • Cael cynnig profion geneteg er mwyn rhagfynegi clefydau, neu yn ystod beichiogrwydd
  • Cymryd rhan mewn prawf meddygaeth fanwl neu ‘bersonol’, e.e. ar gyfer canser
  • Unrhyw ryngweithio â Gwasanaeth Genomeg Feddygol Cymru Gyfan

 

Ymgynghorwyd â’r Bwrdd Seinio presennol ar nifer o bynciau hyd yma gan gynnwys:

  • Dewisiadau ar gyfer cymryd caniatâd cleifion i ddefnyddio eu data genomeg / samplau ar gyfer ymchwil
  • Dylunio gwefan dda sydd â’r cynllun, y cynnwys a’r ymarferoldeb mwyaf addas
  • Ffyrdd o wella ardaloedd clinig a mannau aros yn y gwasanaeth genomeg
  • Cynllunio a deall ystyriaethau o safbwynt cleifion a’r cyhoedd ar gyfer lleoliad newydd arfaethedig y gwasanaethau genomeg
  • Cynnwys taflenni gwybodaeth a deunydd ategol arall ar gyfer apwyntiadau
  • Ystyriaethau penodol i gleifion wrth gyflwyno rhai gwasanaethau genomeg newydd
  • Sut y gall rhaglenni cysylltiedig eraill sicrhau y gall cleifion a’r cyhoedd gael eu cynnwys yn eu gwaith
  • Cynnwys ac ymagwedd ar gyfer cynhadledd fawr oedd yn hyrwyddo pob agwedd ar genomeg

Bydd y grŵp hwn yn parhau i weithio gydag aelodau eraill o Bartneriaeth Genomeg Cymru er mwyn:

  • Ein helpu i lunio deunyddiau cyfathrebu i gleifion/y cyhoedd
  • Ein helpu i wella ymwybyddiaeth cleifion/y cyhoedd o brofion geneteg a genomeg
  • Ein helpu i wella ein prosesau caniatâd ar sail gwybodaeth a thaflenni gwybodaeth i gleifion
  • Ein helpu i lunio ein dull o rannu samplau a data er budd ymchwil a gofal clinigol
  • Ein helpu i lunio ein dull o ddarparu gwasanaethau genomeg i’n cleifion
  • Ein helpu i sicrhau bod cleifion a’u teuluoedd yn parhau i fod wrth wraidd ein gwaith

Ymunwch â'r Bwrdd Seinio.

  • Os oes gennych chi ddiddordeb mewn gwneud cais i fod yn aelod o’r Bwrdd Seinio hwn, cadwch lygad ar sianeli ein cyfryngau cymdeithasol.
  • Fel arfer, ein nod yw recriwtio carfan newydd rhwng mis Mawrth a mis Mai yn barod ar gyfer ein hymgynghoriad yn yr haf a gynhelir ym mis Gorffennaf.