Dr Sophie Harding yn dechrau rôl newydd fel Fferyllydd Ymgynghorol Genomeg a Ffarmacogenomeg

Mae Partneriaeth Genomeg Cymru yn falch iawn o gyhoeddi bod Dr Sophie Harding wedi’i phenodi’n Fferyllydd Ymgynghorol Genomeg a Ffarmacogenomeg i Gymru. Ffarmacogenomeg yw’r astudiaeth o eneteg person i ddeall yn well sut y gallant ymateb i feddyginiaeth. Bydd Sophie yn gweithio ar lefel Cymru gyfan tra wedi’i lleoli ym Mwrdd Iechyd Prifysgol Caerdydd a’r Fro, ac yn arwain y fenter genedlaethol sy’n ceisio integreiddio profion ffarmacogenomig yn llwyddiannus ym mhob maes gofal iechyd ledled Cymru.

Yn ei rôl newydd, bydd Sophie yn gweithio gydag ystod eang o randdeiliaid clinigol ac academaidd i ganolbwyntio ar y meysydd allweddol canlynol:

• Gweithredu profion ffarmacogenomig o fewn ymarfer clinigol arferol ar draws pob sector
• Cyhoeddi Cynllun Cyflawni Ffarmacogenomeg, a fydd yn darparu map ffordd i wreiddio ffarmacogenomeg o fewn ymarfer clinigol arferol
• Sicrhau bod gan weithlu’r GIG y lefel briodol o wybodaeth ffarmacogenomig i gefnogi a thrin cleifion yng Nghymru
• Codi ymwybyddiaeth o ffarmacogenomeg ledled Cymru a rhannu datblygiadau o Gymru ar y cyd â gwledydd eraill y DU lle bo modd.

Cafodd Sophie brofiad helaeth, uniongyrchol o ffarmacogenomeg yn ei swydd flaenorol fel fferyllydd rhagnodi canser arbenigol, lle bu’n cymhwyso ymarfer ffarmacogenomig yn ddyddiol wrth ofyn am brofion, adolygu canlyniadau profion a defnyddio’r canlyniadau hyn i lywio penderfyniadau rhagnodi.

Yn y gorffennol mae Sophie wedi cyd-arwain y gwaith o roi profion ffarmacogenomig ar waith yn lleol ac yn genedlaethol yng Nghymru ochr yn ochr ag uwch gydweithwyr amlbroffesiynol, ac mae wedi gweithio’n strategol ar draws y DU o fewn swydd arwain ffarmacogenomig ar gyfer y Gymdeithas Fferyllol Frenhinol. Yma, bu’n eirioli dros rôl fferylliaeth mewn ffarmacogenomeg a lluniodd ddarlun clir o’r dirwedd genomig ledled y DU, tra hefyd yn datblygu cysylltiadau rhwydweithio rhwng cenhedloedd y DU. Yn fwy diweddar, bu Sophie yn cyd-arwain y gwaith o ddatblygu cynllun gweithlu genomig strategol i Gymru, gyda’r nod o baratoi’r gweithlu ar gyfer gweithredu genomeg o fewn gofal iechyd arferol, gyda ffarmacogenomeg yn cynrychioli elfen allweddol o’r cynllun.

Wrth siarad â Phartneriaeth Genomeg Cymru, dywedodd Sophie:

“Rwy’n llawn cymhelliant ac yn ymroddedig i arwain a chynorthwyo’r gwaith o ehangu gwasanaethau profi ffarmacogenomig i bob sector o ofal iechyd. Nod y defnydd o brofion ffarmacogenomig yw darparu triniaethau diogel wedi’u teilwra’n rheolaidd i bob claf ledled Cymru.”

Mae ymchwil gyfredol yn awgrymu, wrth ein helpu i ddeall effeithiolrwydd meddyginiaeth ar gyfer unigolyn, y gallai ffarmacogenomeg leihau sgil-effeithiau cymaint â 30%.  Mae’r defnydd o brofion ffarmacogenomig arferol o fewn y GIG yn debygol o olygu symud i ffwrdd o’r un dull cyffredinol i bawb presennol tuag at ddull rhagnodi wedi’i deilwra, sy’n fwy diogel ac yn fwy effeithiol i gleifion. Er bod angen mwy o ymchwil, credir bod ffarmacogenomeg yn cynnig llawer o fanteision posibl ychwanegol i wasanaethau’r GIG, megis lleihau derbyniadau i’r ysbyty, lleihau nifer yr ymweliadau ag ysbytai a meddygon teulu, a lleihau gwastraff meddyginiaethau.