Claf Canser yr Ysgyfaint Craig Maxwell yn cwblhau taith gerdded epig 780 milltir i helpu i wella llwybrau canser yng Nghymru
Ddydd Sul 10fed Mawrth, gwnaeth Craig Maxwell, sydd â chanser yr ysgyfaint EGFR+ nad oes modd ei drin na gwella ohono, gwblhau ei Her Llwybr Arfordirol anhygoel i godi arian ar gyfer Cronfa Genomeg Teulu Maxwell ar ran Canolfan Ganser Felindre a threial clinigol biopsi hylif QuicDNA. Drwy gydol y daith gerdded, roedd Craig yn cario pêl rygbi gêm Cymru yn erbyn Ffrainc y Chwe Gwlad, ac ar ddiwedd y daith, yng nghwmni ei wraig Tracey a’u dau o blant Isla a Zach, cerddodd i’r cae rygbi lle cododd 71 o gefnogwyr ar eu traed i’w gymeradwyo.
Teithiodd Craig 780 milltir o lwybr arfordir Cymru dros 26 diwrnod fel rhan o’r her. Ymunodd cyfanswm o 600 o gerddwyr ag ef, gyda llu ohonynt yn enwogion gan gynnwys y cyflwynydd teledu Gethin Jones, y digrifwr Rhod Gilbert, y dyn tywydd Derek Brockway a’r cyn chwaraewyr rygbi Sam Warburton, Jamie Roberts a Josh Navidi. Dewiswyd y pellter o 780 milltir i gynrychioli’r 78 diwrnod a gymerodd i Craig dderbyn ei ddiagnosis o’r adeg y daeth o hyd i’w diwmor a’r 26 diwrnod i gynrychioli’r treial QuicDNA, sy’n anelu at leihau amser diagnosis ar gyfer cleifion canser yr ysgyfaint i uchafswm o 26 diwrnod.
Hefyd yn ymuno â Craig ar gyfer rhannau o’r daith oedd Michaela John, Pennaeth Rhaglenni Partneriaeth Genomeg Cymru, Aelod o’r Bwrdd Seinio Clare Gabriel, a Magda Meissner, Arweinydd Clinigol ar gyfer treial biopsi hylif QuicDNA.
Gyda £877,000 wedi’i godi eisoes, mae’r cyn gyfarwyddwr masnachol i Undeb Rygbi Cymru yn anelu at godi swm aruthrol o £1m ar gyfer Cronfa Teulu Maxwell, cronfa fel rhan o Ganolfan Ganser Felindre, i wella a datblygu’r llwybr canser yng Nghymru.
I ddarganfod mwy am daith codi arian Craig, ewch i Wefan Cronfa Genomeg Teulu Maxwell neu darllenwch fwy am dreial clinigol Biopsi Hylif QuicDNA yma.