Ar 28 a 29 Ionawr, bydd Partneriaeth Genomeg Cymru yn arddangos yng Ngŵyl Genomeg a Bioddata yn Excel Llundain. Dewch o hyd i ni yn stondin 164, lle byddwn yn taflu goleuni ar arbenigedd genomeg yng Nghymru ochr yn ochr â’n partneriaid Parc Geneteg Cymru, Gwasanaeth Genomeg Feddygol Cymru Gyfan ac Uned Genomeg Pathogenau Iechyd Cyhoeddus Cymru a Rhaglen Genomeg Iechyd y Cyhoedd.
Rydym yn falch o rannu’r rhestr anhygoel o siaradwyr o bob rhan o’n sefydliadau partner a fydd yn taflu goleuni ar sut mae Cymru’n arwain y ffordd o ran arbenigedd genomeg.
Ar y diwrnod cyntaf, bydd Suzanne Rankin, Prif Weithredwr Bwrdd Iechyd Prifysgol Caerdydd a’r Fro ac Uwch Swyddog Cyfrifol Partneriaeth Genomeg Cymru, ar y Prif Lwyfan am 10.00am, gan gymryd rhan mewn trafodaeth banel sy’n archwilio strategaethau ymarferol ar gyfer cyflawni’r degawd nesaf o iechyd a gofal yn y DU, a’r hyn sydd nesaf i’n GIG.
Am 12.00pm, bydd Pennaeth Rhaglen Genomeg Iechyd y Cyhoedd ar gyfer Iechyd Cyhoeddus Cymru, yr Athro Tom Connor, ar y llwyfan Bacteria, Bygiau a Data Mawr, yn archwilio sut mae genomeg pathogenau yn cael ei defnyddio ar draws system gofal iechyd Cymru i gefnogi mewnwelediadau iechyd ar lefel y boblogaeth.
Hefyd ar y diwrnod cyntaf, bydd Alice Frenken, Rheolwr Prosiect Partneriaeth Genomeg Cymru, a’r Aelod o Fwrdd Seinio Partneriaeth Genomeg Cymru, Jennifer Griffiths, ar Lwyfan y Lolfa Fyw am 2.40pm. Bydd eu sesiwn yn archwilio sut mae cynnwys cleifion yn siapio genomeg yng Nghymru.
Yn ddiweddarach y prynhawn hwnnw, bydd Dr Sophie Harding, Arweinydd Ffarmacogenomeg Gwasanaeth Genomeg Feddygol Cymru Gyfan, yn mynd i’r llwyfan Meddygaeth Fanwl a Haenu Cleifion am 4.10pm, i siarad am sut mae gwasanaethau ffarmacogenomig yn cael eu darparu ledled Cymru, a beth mae hyn yn ei olygu i ofal cleifion.
Ar yr ail ddiwrnod, bydd Dr Sian Morgan, Pennaeth Rhaglenni Arloesi Labordy Genomeg Feddygol Cymru Gyfan, yn siarad ar y llwyfan Diagnosteg Canser am 12.30pm, gan drafod rôl biopsi hylif o fewn llwybrau diagnostig canser y GIG, a sut mae’n trawsnewid dulliau diagnostig.
Yn ddiweddarach yn y dydd, bydd Rhys Vaughan, Rheolwr Cydsynio Genomeg ym Mharc Geneteg Cymru, ar y Llwyfan Bioddata am 4.45pm, yn gwneud cyflwyniad ar ddatblygu dull cydsynio cenedlaethol ar gyfer caffael data gofal iechyd, a beth mae hyn yn ei olygu i ddyfodol ymchwil a gofal sy’n cael ei yrru gan fioddata.
Edrychwn ymlaen at eich gweld chi yno!
I gael rhagor o wybodaeth ac i gofrestru ar gyfer y digwyddiad.